Wa yamo

Kapin kon kulang duha napud diay ka dekada sukad sa atuang una ug katapusang kukabildo —

Ikaw

akong giisip ug giyukboan nga usa sa mga bag-ong haligi sa Ludabi ug Bathalad

1998

bisan sa daklit nga higayon sa gihimo tang panagtigom

apan kini nahimong mabulokon ug mabungahon

Lakaw                                                              D a g a n                                                            Buylo 

sa mga katuigan                                           imong gipadayon talagsaong                        tahas ug misyon 

Ako                                                                  usab                                                                   sa ingon

Sa mga nanglabay'ng katuigan

imong gidawat 

nagkadaiyang pahalipay ug pasidungog

ug sa hilom

ako mapasigarbahong

niduyog-ambit kanimo

Tingali

tukmod sa kahigayunan

pagbuot sa Kahitas-an 

ang nahibalik tang panagsandurot

Niining tungora

Facebook akong giatraka

sa dihang

ikaw nahikaplagan

gatigom og igong kusog 

aron magpaila

balik sa imoha

Naghinamhinam                                               Nanghinaut                                        Nangaliyupo

nga basin                                                           pa diay                                                makahinumdum ka

unya                                                                   ako                                                       nagpaila-ila

Gibalandra pud dayon 

bansagon nilang Pareja ug Hermosa 

kay sayod kong suod pud mo nila

Pagkabuntag

wa ko gyud damha

imong gitagad

akuang pagpaila-ila

gihilam kining balatian

nagmaya kining dughan

mainiton mong pagtimbaya

daw gibayaw sa himaya

Bisan pa man 

sa imuhang mga nadawat 

nga nagkadaiyang plake ug tropeyo

wala gihapon ka mausab

nagpabilin gihapon kang yano

sama sa atong unang panagkita

kaniadto didto sa Gorordo

Nikilab pagbalik 

sa akuang panumduman 

sa gipahigayong writing workshop

gibasa nimo pagbalik 

ang usa ka tudling 

sa sinulat kong balak

kay nahimuot ka

Palihug dawata 

kinasingkasing nga tampo 

alang kanimo 

tinahud kong idolo 

Adonis Durado 

Wa yamo