ไทยสมายล์

Kagahapon sa buntag, igo lang gyud ko nakasulod sa atuang abotanan. Gisugat ko nimo sa imuhang matam-is nga pahiyom. Daw sama kini katam-is sa dugos sa putyokan. Kay naglumpayat man kining pagbati, gidali-dali gyud dayon nako'g hubo ang akuang face mask aron masuklian taka sa akuang Thai Smile. Apan lahi ni akuang bersiyon.

Mas

pilit

Mas 

lawot

Mas 

lawom 

og dulot

Inanay 

nga nanginit 

ang katam-is 

ug ang kalawot 

sa atuang mga pahiyom

Nibukal

Nisilaob

Hangtod 

niabot sa punto 

nga naglikos 

ang atuang mga 

dila 

mahisama sa usa ka milo 

nga hagbay rang 

katukobon

Sulod-guwa 

ang buylo 

sa atuang 

pagginhawa

Nagsugat kini

Nag-akob 

ang atuang mga 

baba

Buot ko nga

magpabilin sa 

pagpa-uraray 

sa pula

nimong mga 

ngabil

Gadahunog 

ang 

pitik 

sa imuhang 

kasingkasing

Sa samang higayon, 

nabati 

pud nimo ang 

lagubo 

sa akuang 

dughan

Padulong na unta kita sa kinapungkayang bahin

Apan 

kalit 

nga 

nibut-ho 

ang 

laing 

binuhat 

nga 

gasapupo 

sa 

abuhon 

ug 

bangis 

nga 

iring

« Iyahang anak »

« Kapikas »

Hinayhinay nga nikunhod ang galagiti ta nga pagbati

Ikaw 

nibalik 

sa 

imuhang 

agi

ingon 

man 

usab 

ako

Kaganinang buntag, igo lang gyud ko nakasulod sa atuang abotanan. Gisugat gihapon ko nimo sa imuhang pahiyom. Apan nahanaw na ang katam-is niini. Inay, nagsagol na ang kaaslom, kapait, ug ang kaparat. Gisuklian gihapon taka sa akuang Thai Smile. Apan niining higayona, wala ko na tangtanga ang panapton nga nagsap-ong sa akuang nawong.