Ang Konduktora ug Ang Puya

gakabiba 

    sa akuang itom nga backpack 

    puno og mga basahon:  dako, gamay, baga, nipis, gaan, bug-at, bag-o, ug daan

gabitbit 

    sa bulsita sa kinaham nga pagkaon

    adunay bugnaw nga botelya sa tam-is ug makatagbaw nga ilimnon. 

nipara 

    sa gapadulong nga kahil nga bus

nisutoy 

    dayon kini og padagan

niplastar 

    sa bakante nga lingkuranan

niduol 

    ang hamtong ug lagsik nga konduktora 

nitunol 

    ko sa bayad

tiket gibutang sa akong palad. 

padayon 

    nga nidagan ang maong bus

saka-kanaog 

    ang mga pasahero

nausab 

    ang talan-awong gibuhat namo kaganina

kay laing pasahero naman ang naa sa eksena.

taudtaud, nipwesto ang konduktora buyon sa drayber

aduna koy nadunggan

puya nga niuha

didto ra ko nakamatikod 

nga aduna diay ROSA nga kuna.

gipikpik 

    sa konduktora ang puya

nga padayon sa pag-uha

nikuha 

    siya og bibiron

sa gamay'ng bag nga panapton

iyahang gipainom ang puya 

aron kini muhilom

ug gihagkan pud dayon.

saka-kanaog 

    ang mga pasahero

nisutoy 

    napud ang kahil nga bus

lain napung hugna sa susamang talan-awon

bag-ong panagway

nibalik

    ang konduktora sa naandan nga pwesto 

gitabyog

               gihagkan

                              ang nahilom na nga puya

unya iyaha kining gikuha sa ROSA nga kuna

                             

                                gigukos 

                                             gihalukan

                                                              gihagwa

pagkakita 

    namo

sa puya nga gikan sa ROSA nga kuna

hasta namong lipaya

labi na sa pahiyom ug pagkaway niya

buot ko pa untang magdugay uban nila

apan naabot nako sa akuang dapit padulngan

niadto 

    ko sa pwesto sa konduktora

gakugos 

    gihapon sa bibo nga puya

gisekreto 

    nako'g hatag ang duha ka papel gikan sa bulsa

"Palit unya og gatas para sa matahom nga puya."

gakabiba

gabitbit

nanghupaw 

nihilak

namulong

"Ginoo, panalangini ang konduktora ug ang puya."